Dialog Imajinatif : Jampang, Pitung, Jiih, Rais

Empat Jagoan yang hidup pada zaman berbeda, Jampang yang lebih tuaan dan tiga orang jagoan laennya yang hidup sejaman (kalo saleh soal kehidupan para jagoan tersebut, aye muhun maap.

Minggu kemaren, tepatnye tanggal 22 juni 2014, Jakarta terlanjur berumur 4 abad lebih setengehnye. Buat kote yang udah setue entu pastinye banyak banget catetan sejarahnye. Aye sedikit berimajinasi, ngebayangin kalo empat jagoan betawi yang pernah hidup dijamannye, (tapi soal Bang Jampang sebagian nganggepnye cuman legende) kongkow bareng di warung kopi mpok Hindun. Nggak ade salehnye sih, tapi kalo ade yang enggak sudi, muhun maap aje, imajinasi ini sekedar ngelepas pikiran yang penat memandang kote kite yang nggak ade abisnye dirundung masaleh.

Bang Jampang ngelepusin asep klobotnye, kumisnye gerak-gerak, ngikutin irama bibirnya yang dimonyong-monyongin. Goloknye ngegantung dipinggang, kakinye ngangkang, diangkat sebelah diatas bangku. Gelang baharnye yang berbentuk ular kobra item tambah bikin serem orang yang ngeliatnye.

“Tung, gua denger kabar, betawi lagi kriyaan ni ari, ape bener?”

“Denger-denger sih gitu bang, tapi pastinye kriyaan ape, entu yang aye kaga ngarti!” pitung nyruput kopi buatan mpok Hindun yang terkenal mantebnye.

Baca lebih lanjut

Jakarta is My Country

Sore ba’da ashar disudut jalan kampung rawabelong, kayaknye ade kriyaan. Umbul-umbul dari daun kelape mude, ame lampu sentir udah bebarisan kayek bebek mau nyemplung ke empang. Sementara anak-anak yang masih pade ingusan, lelarian nyambut sore. Seperti biase menjelang maghrib anak-anak di sekitar kampung rawabelong maen di lapangan milik haji Sulaeman almarhum.

“Assalamu’alaikum, tung….!!! setengeh tereak, Jampang ngelompatin jaro rumah Pitung persis dipojokan rawabelong, tempat mangkal tukang bunge sebelah jalan Sulaeman. Belah lornya musholeh, punye engkong Sulaeman. Mangkenye tuh jalan seukuran lima depa dikasih nama jalan sulaeman, dedengkot jagoan rawabelong. Kumpeni, ….cere dah…..!

“Walaikum salam, dari mane lu bang? Kendirian aje, katenye ame Rais. Mane die?” Pitung celingukan nyari orang nyang dimaksud.

“Kuan, gue juga nyari ampe ngider-ngider, katenye sih kerumehnye Rodiah dulu, Jiih lagi meriang udah semingguan” sambil ngelintingin kumisnye nyang baplang. Tangan kirinye ngambil kopi yang nagkring di meja.

“Et dah,….belon ditawarin udah elu embat aje…! Gue kendiri belon minum barang seruputan!”

“tenggorokan gue kering, aus banget!”

“Lu bilang ade nyang mau diomongin. Buruan dah, jangan pake pelngas-plengos kemane-mane, kalu kate orang jaman kude makan roti (maksudnye jaman sekarang kali ya) to the point, please dong ah…..

“Begini, gue dateng dimari emang ade yang mau gue omongin. Kate si Rais ade tamu asing kemaren luse. Bentaran lagi mau nyambangin rumeh elu. Katenye sih tuh orang asli betawi tinggal di Marunde. Jangan-jangan turunan orang Bugis nyag rumehnye elu satronin”

Jampang sambil berdiri, ngeluarin golok cimandenya. Golok nyang udah nebas bejibun leher kumpeni. “gue sih selempang aje ame tuh anak, jege-jage!

Belon abis Jampang nyerocos, sekelebatan bayangan orang masup pekarangan. Rupenye, orang yang lagi diomongin jaware kumis baplang, ujug-ujug udah nongol ngejogrog di depan Jampang.

“Assalamu’alaikum…!” sambil ngangkat kedua tangan orang ntu nundukin kepalanya.

“Waalaikum salam warohmatulloh ……!!” Pitung ngejawab langsung bediri.

“Silakan dah duduk…..Ade perlu ape lu kemari? langsung aje Pitung bererot nyerocos penuh selidik.

“Sebelonnya, aye perkenalkan diri dulu dah. Name aye Sabeni bin Haji Mughni Marunda bin Haji Sabeni bin Haji Karim Bin Haji Sholeh Bin Haji Muhammad Ronda Bin Haji Salim Bin Haji Mughni Rawa Belong yang katenye masih sudare ame kong haji Sulaeman. Aye dateng dari jaman belakangan, tahun 2008. Sekarang aye tinggal di Marunde Baru, depan Masjid Bahrul Ulum, sarang bango” sabeni nyoba ngejelasin asal-usulnya.

“Bentar-bentar. lu bilang, lu turunan Haji Mughni, nah entu kan Babe gue, Salim ntu ade gue yang dibunuh kumpeni. Jadi elu masih turunan gue, begitu?” Pitung ngerase heran.

“Betul, bang eh kong eh…manggilnye ape nih ya?

“gue masih belon percaye…..! Pitung ngebentak

“Ini aye bawe tande mate” Sabeni ngeluarin golok yang kayaknya udah ratusan taon umurnya. Golok dengan sarung yang penuh ukiran dan ade tulisan arab melayu digagangnya, tulisan pitung jaware rawabelong anak haji Mughni ade taonnye lagi.

Pitung keheranan ngeliat goloknya. Dalem hati “Inikan golok yang gue tinggal di rumah orang bugis ntu. Kenape ade di die?. Pitung manggut-manggut, kayaknya sih percaye.

“Terus ngape lu bisa nyasar dimari? Keperluan lu apa?” tanya Jampang yang sedari tadi merengut kayak kucing kagak kebagian tulang ikan.

“Aye cuman mau ngasih tau, Betawi nyang sekarang aye tinggalin namenye berubah jadi Jakarta, dan umurnya nih udah 400-an taon. Sering kebanjiran, jalanan pedet ame mobil, polusi udare di mane-mane sebab asep mobil, montor dan pabrik. Kita udah kagak ade harga dirinya sebab seluruh asset harta benda dijual ke orang asing. Tapi kita juga termasup bangsa yang maju, bang….! jelas Sabeni

“Jadi lu dimari cuman mau jelasin begono doang …..!!! kata Pitung

“Bang, elu ngarti kagak? tanya Pitung ke Jampang

Jampang geleng-geleng kepala sambil muntir kumisnye nyang baplang.

to be continued……

by: gambang.wordpress.com