Dialog Imajinatif : Jampang, Pitung, Jiih, Rais

Empat Jagoan yang hidup pada zaman berbeda, Jampang yang lebih tuaan dan tiga orang jagoan laennya yang hidup sejaman (kalo saleh soal kehidupan para jagoan tersebut, aye muhun maap.

Minggu kemaren, tepatnye tanggal 22 juni 2014, Jakarta terlanjur berumur 4 abad lebih setengehnye. Buat kote yang udah setue entu pastinye banyak banget catetan sejarahnye. Aye sedikit berimajinasi, ngebayangin kalo empat jagoan betawi yang pernah hidup dijamannye, (tapi soal Bang Jampang sebagian nganggepnye cuman legende) kongkow bareng di warung kopi mpok Hindun. Nggak ade salehnye sih, tapi kalo ade yang enggak sudi, muhun maap aje, imajinasi ini sekedar ngelepas pikiran yang penat memandang kote kite yang nggak ade abisnye dirundung masaleh.

Bang Jampang ngelepusin asep klobotnye, kumisnye gerak-gerak, ngikutin irama bibirnya yang dimonyong-monyongin. Goloknye ngegantung dipinggang, kakinye ngangkang, diangkat sebelah diatas bangku. Gelang baharnye yang berbentuk ular kobra item tambah bikin serem orang yang ngeliatnye.

“Tung, gua denger kabar, betawi lagi kriyaan ni ari, ape bener?”

“Denger-denger sih gitu bang, tapi pastinye kriyaan ape, entu yang aye kaga ngarti!” pitung nyruput kopi buatan mpok Hindun yang terkenal mantebnye.

“Yang aye denger, bang, kayaknye soal umur! sambung Rais yang asyik ngilik kuping pake bulu ayam, mulutnye nyengar-ngyengir menikmati gesekan bulu ayam dikupingnye.

“soal umur apaan Is, lu jangan ngarang dah!” jampang nimpalin sambil penuh keheranan mandangin Rais yang masih asyik ngilik kupingnye.

“Begini bang, jaman kite pan kaga ade tuh yang namanya kriyaan besar ngerayain har ngebrojolnye ke dunie. nah, jaman orang-orang belakangan yang namanye kriyaan, bahase mereka pesta ulang tahun, udah biase. Ade yang di warung jejingkrakan, menurut bahase mereka, clubbing, Begitu juge kota betawi, sekarang disebut Jakarta, lagi ulang tahun yang ke 487! jelas Jiih yang bikin temen-temennye bengong kayak kebo¬† dicocok.

“Maksud elu apaan? Pitung balik nanya

“Maksudnye hari ini jakarta udah berumur tua banget dan lagi dirayain meriah sekali, ade petasan yang sampe ke langit, ade musik ngik ngok sebutan buat musik belande, terus ada arak-arakan, bahase mereka sih karnaval, nah begitu bang! imbuh Jiih bikin tambah bingung ketiga jagoan betawi itu.

“Kok elu tau-tauan Jiih? tanya jampang sambil mlintingin kumisnye yang berantakan kena asep klobot.

“Yah, gua gitu loh!” Jiih monyongin bibirnya nyombongin kelebihan pengetahuannya tentang Jakarta

Pitung senyum-senyum aje. Pitung emang kenal betul sama sahabatnye yang satu ini, biar rada slebor, kadang kaga mau mikir panjang kalo udah lagi mareh, namun soal ngebace kitab, Jiih punya kelebihan. Jiih termasup tekun, telaten soal bace buku. Ngelebihin pitung yang juga otaknye moncer, pinter.

Rais masih keheranan, ia jadi minta penjelasan lebih lanjut soal kota kelahirannya yang pada zamannya enggak pernah ade kriyaan besar apalagi pake panggung yang begitu megah, pestanya dinamain pake bahasa inggris segale lagi, Jakarta Night festival.

“Jadi menurut elu betawi waktu umur segitu kaye ape, Ih?

“Jakarte yang kita nyebutnye betawi, udah ga sesepi kite idup. Banak banget berubehnye. Elu akan bengong ngeliat jakarte, ade bis gandeng, kerete listrik, sebentar lagi ade MRT, transportasi massal modern. Tapi juge banyak masaleh yang dihadepin Jakarte dengan ledakan penduduknye yang mangkin bejibun, krisis moral atawe akhlak, sampah dimane=mane, pokoknye ngerusak mate dan lingkungan sekitarnye deh!” jelas Jiih nyerocos kaye mercon cabe rawit.

 

to be continued …

 

 

 

 

 

 

 

 

 

 

 

2 thoughts on “Dialog Imajinatif : Jampang, Pitung, Jiih, Rais

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s